Malesa cardiovascular

Malesanan cardiovascular ta un di e motibonan di mas grandi di morto na Aruba. Hopi hende ta sufri di e malesanan cardiovascular. Pa hopi aña nos mester a manda e gran mayoria di asegurado pa Colombia pa haya tratamento. Danki na e iniciativa di nos propio cardiologonan y Dokter Horacio Oduber Hospitaal, nos por a yega -desde april 2018- na nos propio departamento di caterisacion di curason. Aki ta unda pashentnan cu tin mester di por ehempel un ˮstentˮ ta haya esaki. Tambe ta haci e asina yama diagnostico CAG, by pass y drecha of reemplasa klep di curason.

Pero kico ta malesanan cardiovascular?

Malesanan cardiovascular ta tur e malesanan cu tin di haber cu e curason y of e adernan. Algun di e malesanan aki un persona por haya desde su nacemento, otro despues den su bida. Importante ta pa realisa cu nos tur por haya un malesa cardiovascular. E chens pa baha e riesgo ta door di hiba un bida saludabel (habito di come saludabel y haci movecion diario).

Diferente tipo

Tin diferente malesa di curason y ader. Malesanan di curason como consecuencia di e adernan coronario cu ta birando mas fini of pa motibo di un blokeo diripiente. Esakinan ta adernan cu ta rond di e curason manera un corona y nan ta regula e suministro di sanger pa e curason. E blokeonan (miho bisa e plaketenan cu ta cuminsa forma, interno) den e adernan coronario aki por causa dolor den pecho ora bo haci esfuerzo fisico. Un blokeo (of ceramento) diripiente di e adernan coronario aki ta causa daño na e curason y ta e origin di un infarto di curason, esta unda e curason no ta ricibi suficiente oxigeno.
Otro fayonan di e curason tin di haber cu e mal funccionamento (pompmento) di e curason, infeccion di virus na e curason y disturbio den e ritmo (batimento) di e curason. Tin ora e malesa di curason ta un desviacion of malfuncionamento di e klepnan di e curason.Tambe tin algun pashent cu ta haya malesa di curason relaciona cu e musculo mes di e curason, mester corda cu e curason ta un musculo rond y hol. Ora tin fayo den e musculo, cos ta bay robes.

Cifra di Aruba

Actualmente nos tin 5 cardiologo, di cual 2 ta cardiologonan intervencionista. Hunto nan ta trata alrededor di 6000 pashent pa aña. E total mes di pashent cu ta uza remedi pa malesa of problema di curason ta alrededor di 20.000 pashent di cual e porcentahe di hende muhe cu tin un malesa di curason ta mas halto (58%) compara cu e porcentahe di hende homber (42%).

Algemene Ziektekosten Verzekering