Remedi

Nos tin un lista positivo. Esaki ta e lista di remedi cu ta bisa e dunadonan di cuido cua remedinan AZV ta cubri pa bo. E ta un lista amplio y pa cual bo mester tin conocemento di remedi pa compronde esaki. E lista di remedi ta menciona e.o. e nomber di e remedi, e substancianan den dje, e formato (likido, pildo of crema), e cantidad y mucho mas.

Farmaterapeutico

Den prome instante AZV ta wak si e remedi ta un bon remedi (farmaterapeutico) y na di dos luga ta wak e prijs di e remedi (eficiente, bon prijs). Bo dokter di cas y specialista tin informacion tocante cua remedi nos ta cubri. Den caso cu bo dokter di cas of specialista no tin e informacion, semper e por yama nos pa consulta. Igualmente, ora un botica haya bo receta, e mester por lesa esaki bon y den caso cu tin cualkier pregunta, e tambe por comunica directo cu bo dokter di cas of specialista.

Meta

E meta semper ta pa salvaguardia e salud di abo como pashent. Tur dunado di cuido ta percura pa monitoria bon e combinacion di remedi cu bo ta uza.

Categoria di remedi

E Lista Positivo tin hopi remedi pa trata diferente malesa, entre otro:

  • Remedi pa trata e stoma, tripa y of higra.
  • Remedi pa trata malesanan di sanger.
  • Remedi pa trata malesanan di curason y ader.
  • Remedi pa trata malesanan di cuero.
  • Remedi pa trata e sistema urogenital y riñon (nan).
  • Remedi pa trata malesanan ocasiona door di microrganismo (parasito, bacteria, virus, schimmel).
  • Remedi pa trata tumornan benigno y maligno.
  • Remedi pa trata malesanan di weso y musculo.
  • Remedi pa trata e sistema nervioso y sentidonan.
  • Remedi pa trata e sistema respiratorio.
  • Remedi pa trata varios otro tipo di malesa / organo.

Advies Commissie Geneesmiddelenlijst AZV (AGA)

E Lista Positivo ta un lista dinamico. Esey ta nifica cu constantemente ta monitoria e desaroyonan den mundo farmaceutico. Remedinan nobo ta bin riba mercado, otronan no ta wordo fabrica mas. Kiermen e lista ta wordo adapta segun e desaroyonan. E Lista Positivo a wordo compila door di Advies Commissie Geneesmiddelenlijst AZV, esta AGA.

AGA ta un comision di experto y tin e tarea pa duna conseho tocante tratamento medico cu enfasis riba remedi. AGA ta sigui den principio e criteria di College voor Zorgverkeringen (CvZ) di Hulanda, tanten cu esaki ta aplicabel pa e situacion di Aruba. CvZ ta mantene e publicacion di e Farmacotherapeutisch Kompas cu ta wordo traha bou di responsabilidad di e Comision di Cuido Farmaceutico (CFH) di Hulanda.

Busca remedi

Ora bo dokter di cas of specialista receta remedi, bo ta acudi cerca bo botica pa entrega e receta y bo botica lo duna bo e remedi. Den caso cu e botica no tin e remedi pa bo, e botica (boticario) mester comunica cu bo dokter pa evalua cua otro remedi bo por haya.

Kico AZV no ta cubri

Bo seguro AZV no ta cubri OTC, esta e remedinan of productonan ʾOver The Counterʾ cu bo por haya cumpra den botica (sin tin mester di un receta di dokter). Tambe ta importante pa tuma nota cu tin otro cosnan cu no ta cay bou di e pakete di AZV. Esakinan ta:

  • Suplemento di cuminda y of parecido
  • Un chekeo general preventivo.
  • Un keuring pa rijbewijs.
  • Un keuring en conexion cu solicitud di trabou.
  • Un keuring en conexion cu peticion pa permiso na Dimas.
  • Transplante di organo (cu excepcion di cornea y beenmerg)
  • Tratamento of operacionnan den fase experimental.
  • Test DNA pa confirma paternidad.
  • Declaracion di morto.
Scroll To Top

Algemene Ziektekosten Verzekering