Empleadonan publico

AZV ta ehecuta e Ley di AZV cu ta conta pa tur hende, pero banda di esey AZV ta administra e seguro medico di e empleadonan publico. Ta asina cu e empleadonan publico tin un seguro adicional cu ta yama AZV Plus.

AZV Plus ta un seguro di dunado di trabou, cual den e caso aki ta Gobierno di Aruba. E empleadonan publico y empleadonan publico cu pensioen tin derecho riba AZV banda di e pakete di AZV (basico). Banda di esakinan un persona cu tin mesun derecho cu empleado publico (arbeidscontractanten y gelijkgestelden) tin AZV Plus.

No ta e trahado so tin derecho riba AZV Plus, pero tambe su casa y yiunan (pa kende kindertoelage ta wordo ricibi).

Pakete

Ocho tipo di tratamento ta cay bou di AZV Plus. Akinan nos ta duna un splicacion pa cada un di nan.

1. Logopedia

Ora un medico ta haya tratamento di un logopedista deseabel e asegurado tin derecho riba 12 sesion adicional riba loke ta wordo cubri door di AZV basico. Den casonan particular Organo Ehecutivo AZV por, a base di peticion di un medico, extende e cantidad di sesion. Esaki ta bay cu 12 sesion maximo cada biaha, cual tin cu wordo aproba door di AZV adelanta.

2. Fisioterapia

Den caso cu bo a haya caba e cantidad maximo di sesion di fisioterapia bou di AZV pa 1 cierto indicacion den 1 aña, bo por haya 12 extra sesion cu ta cay bou di AZV Plus.

3. Chiropractica

Den caso cu bo dokter di cas of specialista ta haya necesario, 12 sesion di chiropractica ta wordo cubri cu aprobacion di Organo Ehecutivo AZV. Organo Ehecutivo AZV por extende e cantidad di sesion. Esaki ta bay cu 12 sesion maximo cada biaha.

4. Bril

Tin un compensacion maximo di afl. 350,- pa montura y glasnan di bril pa maximo 1 biaha pa cada 2 aña. Pa asina yama glasnan “high index” y contactlenzen tin mesun compensacion si nan a wordo prescribi y bo tin un dioptria di 6 of mas halto.
Si den e periodo di 2 aña bo refraccion ta cambia, e ta posibel pa haya e recompensacion den e periodo ey. Naturalmente mester di un prescripcion di bo dokter di wowo of opticien cu e refraccion a cambia.

5. Psicologia

Den caso cu bo dokter di cas of specialista ta haya necesario, 12 sesion di cuido psicologico ta wordo cubri. AZV por, a base di peticion di un dokter, extende e cantidad di sesion. Esaki ta bay cu 12 sesion maximo cada biaha.

6. Dentista

Pa limpieza di djente ta existi un compensacion di afl.58,50 pa maximo 2 biaha pa aña. Pa un protesis di frame y tratamento ortodontico pa clase II-1 (deep bite), clase II-2 (open bite) y clase III, unda ta sosode problema di come of papia tin e siguiente compensacion ora AZV a duna un aprobacion a base di peticion di un dentista:

  • Pa e protesis di frame (vitalium)
  • 1 elemento afl. 153,-
  • 2 elemento afl. 180,-
  • 3 elemento afl. 207,-
  • 4 elemento afl. 234,-
  • 5 elemento afl. 261,-
  • 6 elemento afl. 288,-
  • 7 elemento afl. 315,-
  • 8 elemento afl. 342,-
  • 9 elemento afl. 369,-
  • Pa tratamento ortodontico afl. 4050,-

7. AZV Plus durante dienstreis

Si bo ta bira malo durante un dienstreis of bo ta haya un accidente di trabou. Tur e gastonan medico ta wordo cubri door di AZV Plus. E ora ey bo tin derecho riba 100% di restitucion.

8. AZV Plus ora di bay cu vacacion den exterior

Si bo ta bay exterior pa vacacion no lubida di cumpra un seguro di biahe. AZV Plus ta cubri solamente e gastonan cu no ta wordo cubri door di bo seguro di biahe. Y banda di esey mester ta trata di un tipo di cuido medico urgente cu no por wordo pospone te regreso na Aruba. Dus, semper cumpra un seguro di biahe ora di bay cu vacacion.

Prima

E gastonan di AZV Plus ta wordo paga door di e dunador di trabou di e asegurado (Gobierno di Aruba). E asegurado ta paga 0,5% extra na prima pa cubri e gastonan di e seguro aki. Fin di aña AZV ta conta tur e gastonan cu a wordo haci bou di AZV Plus y e cuenta ta wordo manda pa Gobierno di Aruba. Encontrario cu e sistema di AZV normal, tin un aporte propio ora ta haci uzo di AZV Plus. 10% di e gastonan di un tratamento cu ta cay bou di AZV Plus tin cu wordo paga door di e asegurado mes.

Empleado publico pensionado

Pa empleado publico pensionado ta conta cu nan tin cu avisa AZV ora nan ta bay exterior. Esaki por via un carta, pero ta mas facil via e formulario riba e website aki. Un empleado publico pensionado por keda den exterior te cu 1 aña largo. Gastonan medico cu ta wordo haci den e periode aki ta wordo cubri pa 90%.

Procedura

Cu e introduccion di e AZV app no tin mester mas di e ‘verklaring van dienst’. Den e digiZorgpas un dunador di cuido por wak si bo tin derecho riba AZV plus. E informacion den e AZV app semper ta up to date. Si bo tin derecho riba AZV plus, pero e no ta visibel den e digiZorgpas, por fabor tuma contact cu e persona responsabel pa recursonan humano na bo departamento.

Restitucion

Pa haya restitucion di gasto medico cu bo a haci den exterior, por yena e formulario aki (RESTITUTIEFORMULIER) Tambe tin mester di e reportahe medico di e clinica. Un peticion di restitucion mester wordo entrega prome cu 1 aña y 3 luna despues di e tratamento a tuma luga. Peticionnan cu ta yega mas laat lo no wordo trata mas.

Scroll To Top

Algemene Ziektekosten Verzekering