Mi kier check si mi peticion a drenta?
Pa haya sa si dokter a manda bo peticion e ta bon pa bo mes pidi dokter un copia di e peticion of pa bo tin un copia di bo peticion. E ora AZV por check sigur ki dia el a drenta. E peticion ta wordo evalua door di un comision independiente, esta e “Commissie Grensoverschrijdende Zorg” (CGZ). Despues di evalua e peticion, CGZ ta duna un conseho na AZV. Den mayoria caso, AZV ta tuma e conseho over di CGZ. Ora cu bo haya un aprobacion di AZV, esaki ta nifica cu AZV ta bay regla e afspraak, biahe y estadia pa e asegurado y su acompañante social. E asegurado ta bay e pais cu AZV ta indica.
Unda mi ta bay?
Bo ta bay e pais cu AZV asigna bo. AZV ta traha cu Corsow, Colombia, Hulanda y Merca.
Ki dia mi ta bay exterior?
Na momento cu AZV ricibi tur informacion di e clinica den exterior incluyendo e confirmacion di e afspraak y plan di tratamento.
Ki dia mi ta haya e begeleidersbrief (carta pa trabou)?
E begeleidersbrief ta wordo duna despues cu e cita (cu e hospital den exterior) ta conoci, e ticketnan a wordo cumpra (door di AZV) y tur detaye rond di e biahe a wordo confirma. Den futuro cercano lo e asegurado por wak esaki den e app di AZV.
Dicon mi mester keda asina largo den exterior?
E duracion di bo tratamento medico ta depende di bo malesa y con bo curpa reacciona riba e tratamento cu ta wordo duna.
Unda mi ta bay keda?
Ta depende di cua pais AZV mandabo, ora e departamento di Cuido Medico den Exterior ricibi tur informacion, lo bo haya esaki.
Cuanto placa mi ta haya di AZV?
E aporte financiero di AZV (daggeldvergoeding) ta un suma di entre $10 pa $25 pa dia pa e pashent. E aporte ta pa yuda cubri e gastonan di cuminda y awa.
Mi ta wordo busca na airport?
No. Cada pashent y of su acompañante social mes ta responsabel pa nan transporte. AZV ta duna e suma di $40 un solo biaha como un ayudo den e gastonan di transporte.
Mi por biaha despues di e fecha (periodo) indica door di e specialista?
Bo tin cu papia cu bo specialista y e por informa AZV si bo mag di biaha despues di e fecha cu el a indica riba e peticion pa AZV.
Kico tur AZV ta regla pa mi como pashent?
AZV ta regla e cita cu e hospital, e ticket di biahe, e hotel of apartamento pa keda. Tambe e pashent ta ricibi un aporte financiero (daggeldvergoeding) pa yuda cubri e gastonan di cuminda y awa durante estadia den exterior. Entrante 1 di september 2023 e pashent lo ricibi su aporte financiero pa cada dia di estadia den exterior, irespecto si e ta hospitalisa of no.
Kico ta e sumanan di aporte financiero (daggeldvergoeding) pa pashent?
Colombia / Corsow / Merca
$15 pa dia (entrante 1 di september 2023 esaki ta bira $25 pa dia)
Hulanda
€ 20 pa dia (entrante 1 di september 2023 esaki ta bira 30 euro pa dia)
Kico tur AZV ta regla pa e acompañante social?
AZV ta regla e ticket pero e acompañante social tin un aporte propio di 150 florin. Entrante 1 di september 2023 e aporte propio ta cambia y bira 75 florin. AZV a cubri e hotel of apartamento pa keda. E acompañante social ta responsabel pa su mesun cuminda y awa durante estadia. Adicionalmente AZV ta recomenda pa e acompañante social cumpra un seguro di biahe ya cu cualkier emergencia medico di e acompañante social no ta wordo cubri door di AZV.
Con e proceso ta ora mi kier cambia di acompañante social?
Cambio di acompañante ta posibel, sin embargo AZV no ta paga e ticket di biahe pa e segundo (of mas) acompañante. Den caso cu bo tin e intencion di cambia di acompañante, avisa esaki adelanta na e Departamento di Cuido Medico den Exterior di AZV. E ora AZV por tene cuenta cu esaki ora di traha e cartanan di garantia.
Mi ta den exterior y mi mester di ayudo di AZV. Con mi por tuma contacto?
Bo ta manda nos un email na:
[email protected]
