Algemene Ziektekosten Verzekering (AZV)

Inscripcion

Con mi ta inscribi na AZV?

Tur  servicio di AZV ta sosode online, di dialuna pa diabierna di 7:30 te 16:00or.

Bo ta inscribi na AZV door di bay riba nos website y yena e formulario di inscripcion. Bo persona ta attach bo  identificacion valido (sea cedula, paspoort of rijbewijs)  y por ultimo primi riba ‘Manda’. Controla bon cu abo of e apoderado a haya un codigo despues di primi riba manda. Esey ta nifica cu bo peticion a drenta na AZV. Otro opcion ta pa bo entrega un peticion via nos emailadres [email protected]  hunto cu bo indentificacion valido. Unabes e departamento ricibi bo documentonan, nan ta haci e control y si bo ta cualifica pa inscripcion nan ta manda bo un instruccion pa download e AZV app. E prueba di inscripcion na AZV ta bo digiZorgpas cual ta un caarchi digital den bo AZV app. Bo por download e AZV app via Google Play of App store den bo smartphone despues cu bo a inscribi cerca nos.

Persona cu permiso of declaracion (verklaring toelating van rechtswege) 

Si bo tin un permiso di estadia of un declaracion (verklaring toelating van rechtswege) valido bo inscripcion na AZV ta caduca riba e fecha cu bo permiso of declaracion ta caduca. E fecha ey bo lo por wak den bo AZV App (digiZorgpas). E ta importante pa bo renoba bo permiso of declaracion pa bo inscripcion na AZV keda activo.

Tene cuenta cu si bo inscripcion NO wordo prolonga, bo inscripcion ta caduca na e fecha den bo AZV App y eventual gastonan medico ta pa bo propio cuenta.

Pa prolonga bo inscripcion tuma nota di e informacion cu ta sigui.

Prolongacion di inscripcion cu permiso/declaracion

Si bo permiso/declaracion ta bay caduca bo mester percura pa renoba esaki prome. Esaki ta nifica cu bo mester entrega un peticion pa un permiso/declaracion nobo na Dimas. Tene cuenta cu e peticion di entrega pa un permiso/declaracion nobo mester ta entrega na tempo (=esey ta nifica prome cu e permiso/declaracion actual ta caduca).

Bo a entrega un peticion na tempo na DIMAS pa un permiso/declaracion?  

• Si bo persona entrega un peticion pa prolongacion di permiso of declaracion na tempo na DIMAS, es decir prome cu bo permiso of declaracion actual ta bay caduca, bo mester percura pa avisa nos di AZV di esaki via nos email [email protected]
• Ora bo avisa nos, percura pa manda nos un ID valido (sea bo paspoort, cedula of rijbewijs di Reino Hulandes) pa asina nos por controla y procesa bo peticion pa prolongacion di seguro AZV pa un periodo temporal.
• E informacion aki bo lo por wak despues den e AZV app.
• Corda cu asina cu DIMAS tuma un decision positivo riba bo peticion, bo persona mester avisa AZV atrobe di e decision aki via nos email [email protected]
• A base di e desicion di DIMAS aki, nos lo prolonga bo inscripcion temporal conforme e fecha nobo di bo permiso/declaracion.
• Bo por wak e cambio di fecha aki den bo AZV App.
• Den caso cu bo permiso/declaracion a wordo otorga pa tempo indefini, e ora ey e inscripcion na AZV no tin fecha di terminacion.

Bo a entrega un peticion pa un permiso/declaracion laat?

• Si bo entrega un peticion pa prolongacion di permiso of declaracion laat (es decir NO na tempo) na DIMAS, esey kiermen despues di e fecha cu bo permiso of declaracion actual ta caduca, bo inscripcion na AZV tambe ta caduca automaticamente riba e fecha ey.
• Unabes DIMAS a tuma un decision positivo riba bo peticion/declaracion, bo persona tin cu avisa nos di AZV via nos email [email protected]
• Ora bo avisa nos, percura pa manda nos un ID valido (sea bo paspoort, cedula of rijbewijs di Reino Hulandes) pa asina nos por controla y procesa bo peticion pa prolongacion di seguro AZV.
• A base di e desicion di DIMAS aki, nos lo prolonga bo inscripcion retroactivamente (=desde fecha di e cuminsamento di bo permiso/declaracion nobo) te cu fecha di terminacion di e permiso/declaracion.
• E fecha di terminacion di bo inscripcion bo por wak den bo AZV App.
• Den caso cu bo permiso/declaracion a wordo otorga pa tempo indefini e ora ey e inscripcion na AZV no tin fecha di terminacion.
  Si bo a haci gasto medico den e periodo di bo inscripcion nobo, bo por entrega un peticion pa restitucion na nos email [email protected] hunto cu un indentificacion valido incluyendo e factura.

Bo a ricibi un decision negativo di DIMAS?

• Si bo ricibi un desicion negativo di Dimas (afwijzing) riba bo peticion e ora ey bo inscripcion na AZV ta wordo termina. E fecha di terminacion di bo inscripcion bo por wak den bo AZV App.
• Un persona tin e derecho pa entrega un obhecion (bezwaarschrift) contra un decision. Si bo a entrega na Dimas un obhecion contra e decision negativo, bo persona mester informa nos y manda un peticion pa haya un prolongacion temporal di bo inscripcion na AZV na nos email [email protected] hunto cu un identificacion valido.
• Si bo no a entrega un obhecion contra e decision di DIMAS, bo inscripcion na AZV ta termina automaticamente riba e fecha den bo AZV App.
• Unabes bo ricibi un permiso of declaracion nobo for di DIMAS bo mester informa nos y nos lo controla y procesa bo peticion.
• Bo AZV ta drenta na vigor retroactivamente desde e fecha di e cuminsamento di bo permiso/declaracion nobo te cu e fecha di terminacion di bo permiso/declaracion.
• E fecha di terminacion di bo inscripcion nobo bo por wak den bo AZV App.
• Den caso cu bo permiso/declaracion a wordo otorga pa tempo indefini e ora ey e inscripcion na AZV no tin fecha di terminacion.
  Si bo a haci gasto medico den e periodo di bo inscripcion nobo, bo por entrega un peticion pa restitucion na nos email [email protected] hunto cu un identificacion valido incluyendo e factura.

Bo a ricibi un desicion negativo riba bo obhecion (bezwaarschrift)?

E ta nifica cu bo seguro AZV a termina conforme e ultimo fecha den bo AZV app. Pa bin na remarca pa haya AZV bek, lo bo tin cu entrega un permiso/declaracion totalmente nobo.

Pa mas informacion porfabor comunica cu nos via [email protected]

Inscripcion di baby

Semper ta aconsehabel pa inscribi bo baby mas lihe cu ta posibel despues di su nacemento, tanto na Censo como na AZV. Den caso cu bo no logra mesora, e ora mester tene cuenta cu dentro di 2 luna desde e fecha di nacemento, bo inscribi bo baby na AZV. E ora ey e baby por wordo inscribi retroactivamente; esta riba e fecha di su nacemento. Eventual gastonan medico pa e baby den e periodo retroactivo por wordo cubri alsnog door di AZV.

Den caso e peticion pa inscripcion di baby drenta na AZV despues di e 2 luna desde e fecha di nacemento; e inscripcion di e baby ta drenta na vigor riba e fecha cu a haci e peticion na AZV. E ora ey eventual gastonan medico di e baby den e periodo retroactivo no por wordo cubri door di AZV.

Un di e mayornan of un apoderado ta haci e peticion pa inscribi e baby na AZV, conforme e procedura di Inscripcion Online via e website di AZV.

Ki documento mester?

Pa inscripcion di e baby mester manda e siguiente documentonan:

• Identificacion valido di un di e mayornan of apoderado of voogd;
• Carta di apoderacion di e mayor(nan) hunto cu e ID valido di e apoderado;
• Un potret di e baby.

Tin dos grupo di baby cu ta bin na remarca pa inscripcion na AZV pendiente inscripcion na Censo:

1. Baby cu ta rekeri di un permiso.

2. Baby cu ta rekeri di un DNA-test (procedura di reconocemento di Censo). 

1) Baby cu ta rekeri di un permiso: 

Mayor (nan) of apoderado of voogd mester meld na AZV dentro di maximo 2 luna:

• despues di a haci e peticion pa un permiso pa e baby na DIMAS;
• y e mayor (nan) (garantsteller) mester ta inscribi na AZV cu un permiso.

E ora ey bo baby ta bin na remarca pa inscripcion retroactivo desde e fecha di nacemento. Na momento cu e baby ta inscribi na Censo, e mayor (nan) lo mester avisa AZV pa un prolongacion via email [email protected]

2) Baby cu ta rekeri di un DNA-test (erkenningsprocedure Censo):

Mayor (nan) of apoderado of voogd mester meld na AZV dentro di maximo 2 luna:

• despues di a haci e peticion pa DNA-test;
• hunto y cu prueba di pago di e DNA-test.

E ora ey bo baby ta bin na remarca pa inscripcion retroactivo desde e fecha di nacemento. Na momento cu e baby ta inscribi na Censo, e mayor (nan) mester avisa AZV pa un prolongacion via email [email protected]

A) Ora e baby nace den exterior pasobra mama mester a bay -cu aprobacion di AZV- exterior pa haya su baby.

• Un rekisito importante pa inscripcion na Censo ta cu e acta di nacemento mester ta apostilla for di Colombia.
• E mayor (nan) tin cu haci un peticion na AZV pa inscribi e baby hunto cu e documentonan necesario dentro di maximo 2 luna ora regresa Aruba. E ora ey e baby por wordo inscribi desde e fecha di nacemento.
• Pa baby (nan) di mayor (nan) Hulandes tin cu haci un peticion na DIMAS pa un declaracion (Verklaring van Rechtswege) prome cu bay inscribi e baby na Censo. Despues cu inscribi e baby na Censo ta acerca AZV pa e inscripcion di e baby.
• Si ta trata di un baby cu ta rekeri di un permiso, mester tene cuenta cu tin maximo 2 luna desde fecha di regreso na Aruba pa haci un peticion pa permiso na DIMAS. E ora ey bo baby ta bin na remarca pa inscripcion retroactivo desde e fecha di nacemento. Asina cu a haci e peticion pa permiso na DIMAS tin cu avisa AZV pa inscripcion di e baby.

B) Si bo baby nace na Aruba y keda interna di biaha den Horacio Oduber Hospitaal.

Ora bo baby nace y keda interna di biaha den Horacio Oduber Hospitaal (kiermen di biaha despues di parto), e proceso di inscripcion ta keda mescos cu e informacion akiriba duna.

C) Ora e baby a nace na Aruba y tin cu bay exterior pa haya cuido medico avansa (cu aprobacion di AZV).

Si ta trata di baby di mayor (nan) Hulandes, mester inscribi e baby di biaha na Censo y despues na AZV.

E documentonan cu mester presenta:

• Un ID valido di mayor (nan).
• Acta di nacemento di e baby.

Si ta trata di baby di mayor (nan) cu tin permiso, mester entrega un peticion pa permiso na DIMAS pa e baby y despues meldo na AZV.

E documentonan cu mester presenta:

• Un ID valido di mayor (nan).
• Acta di nacemento di e baby.

Pa mas informacion of pregunta tocante inscripcion di baby por yama 5279900 of email nos na [email protected]