Mi kier check si mi peticion a drenta?
Pa haya sa si dokter a manda bo peticion e ta bon pa bo mes pidi dokter un copia di e peticion of pa bo tin un copia di bo peticion. E ora AZV por check sigur ki dia el a drenta. E peticion ta wordo evalua door di un comision independiente, esta e “Commissie Grensoverschrijdende Zorg” (CGZ). Despues di evalua e peticion, CGZ ta duna un conseho na AZV. Den mayoria caso, AZV ta tuma e conseho over di CGZ. Ora cu bo haya un aprobacion di AZV, esaki ta nifica cu AZV ta bay regla e afspraak, biahe y estadia pa e asegurado. Y den caso cu tin aprobacion pa un acompañante social, e ora ta regla eseynan p’e tambe. E asegurado ta bay e pais cu AZV ta indica.
Unda mi ta bay?
Bo ta bay e pais cu AZV asigna bo. AZV ta traha cu Corsou, Colombia, Hulanda y Merca.
Ki dia mi ta bay exterior?
Na momento cu AZV ricibi tur informacion di e clinica den exterior incluyendo e confirmacion di e afspraak y plan di tratamento.
Ki dia mi ta haya e begeleidersbrief (carta pa trabou)?
E begeleidersbrief ta wordo duna despues cu e cita (cu e hospital den exterior) ta conoci, e ticketnan a wordo cumpra (door di AZV) y tur detaye rond di e biahe a wordo confirma. Den futuro cercano e asegurado lo por wak esaki den e app di AZV tambe.
Dicon mi mester keda asina largo den exterior?
E duracion di bo tratamento medico ta depende di bo malesa y con bo curpa reacciona riba e tratamento cu ta wordo duna. Tambe ta tene cuenta cu loke e specialista den exterior ta conclui y finalmente mester haya un aprobacion di e specialista di Aruba riba e pregunta ki momento su persona por tuma bo bek na Aruba; esta pa bo continuacion di cuido.
Unda mi ta bay keda?
Ta depende di cua pais AZV mandabo, ora e departamento di Cuido Medico den Exterior ricibi tur informacion, lo bo haya esaki.
Cuanto placa mi ta haya di AZV?
E aporte financiero di AZV (daggeldvergoeding) ora bo ta bay Colombia ta 100.000 COP pa dia pa pashent (entrante 1 di augustus 2025). Y $25 pa dia pa pashent ora ta bay Corsou of Merca. Anto e aporte pa Hulanda ta € 30 pa dia. E aporte ta pa yuda cubri e gastonan di cuminda y awa.
Mi ta wordo busca na airport? (AZV tin algo regla pa loke ta e transporte di aeropuerto pa e luga di estadia?)
- Na Corsou no.
- Na Merca tin servicio di shuttle.
- Na Colombia si tin servicio di taxi.
- Na Hulanda ta depende. Basa riba un evaluacion di ki tipo di malesa e asegurado (pashent) tin, ta regla e transporte si of no. Pues tin casonan cu ta haya aprobacion pa transporte, esta di aeropuerto pa e luga di estadia y tin otro no. Tuma nota! AZV ta duna e suma di €40 un solo biaha como un ayudo den e gastonan di transporte. Pues por conclui cu eigenlijk cada pashent y su acompañante mes ta responsabel pa su transporte.
Mi por biaha despues di e fecha (periodo) indica door di e specialista?
Ora bo tin e deseo pa biaha despues di e fecha cu bo specialista a indica, ta bon pa bo informa nos di esaki. Den tal caso AZV ta manda un email pa bo specialista y su persona lo tuma un desicion.
Kico tur AZV ta regla pa mi como pashent?
AZV ta regla e cita cu e hospital, e ticket di biahe y e estadia. Tambe e pashent ta ricibi un aporte financiero (daggeldvergoeding) pa yuda cubri e gastonan di cuminda y awa durante estadia den exterior.
Kico ta e sumanan di aporte financiero (daggeldvergoeding) pa pashent?
Colombia:
100.000 COP (esaki ta e suma entrante 1 di augustus 2025)
Corsou / Merca:
$25 pa dia (esaki ta e suma desde 1 di september 2023)
Hulanda:
€ 30 pa dia (esaki ta e suma desde 1 di september 2023)
Kico tur AZV ta regla pa e acompañante social?
AZV ta regla e ticket y estadia (e luga pa keda). E acompañante social ta responsabel pa su mesun cuminda y awa durante estadia. Adicionalmente AZV ta recomenda fuertemente pa e acompañante social cumpra un seguro di biahe ya cu cualkier emergencia medico di e acompañante social no ta wordo cubri door di AZV.
Con e proceso ta ora mi kier cambia di acompañante social?
Cambio di acompañante ta posibel, sin embargo AZV no ta paga e ticket di biahe pa e segundo (of mas) acompañante. Den caso cu bo tin e intencion di cambia di acompañante, avisa esaki adelanta na e Departamento di Cuido Medico den Exterior di AZV. E ora AZV por tene cuenta cu esaki ora di traha e cartanan di garantia. Esaki ta nifica cu mester corda di entrega copia di ticket y paspoort na balie di AZV cada bes cu tin cambio di acompañante social. Asina no solamente AZV ta na altura tocante e siguiente acompañante social; pero tambe ta (keda) informa e hospital y luga di estadia den exterior.
Mi ta den exterior y mi mester di ayudo di AZV. Con mi por tuma contacto?
Bo ta manda nos un email na:
[email protected]
