Macho Crioyo

September 30, 2019

Dia 19 di december ta dia Internacional di hende homber. E aña aki AZV a dicidi di organisa un evento special pa hende homber, pero pakico eigenlijk?

Den e mission di AZV ta skirbi cu AZV ta pa tur ciudadano di Aruba. AZV ta un sistema di Universal Health Coverage, manera World Health Organization ta yamele y ta promove. E base di Universal Health Coverage ta cu mester tin cuido medico pa tur cuidadano sin discriminacion di edad, si bo ta rico of pober, salud of malo, hende homber of hende muher.

Prevencion

AZV, pa via di ley, ta cubri gastonan di cuido curativo, pero logicamente nos no kier warda te ora un hende ta malo pa e cuida su salud. P’esey nos ta enfoca tambe riba prevencion y ta yuda iniciativa di profesionalnan den salud y fundacionnan riba tereno di prevencion. Riba termino largo esey lo ta mas eficiente y efectivo pa nos miembronan, e pueblo di Aruba. Segun comentarionan di dunadornan di cuido nos ta tende cu hende homber ‘no ta gusta bay dokter’, ‘nan ta bay mucho laat’ (dus ora e un malesa a desaroya caba) y ‘cu nan no ta cuida nan salud manera debe ser’. Suficiente razon pa AZV pa bay op zoek na “e hende homber”. Esey ta parce mas facil cu e ta en berdad.

Hende homber, unda nan ta?

Si nos wak e total di asegurado registra na AZV (cu ta den principio tur hende na Aruba) ta mira cu hende homber ta den mayoria di 0 ta 20 aña. Despues e cantidad di tur dos sexo ta bira menos door di hobenan cu ta bay studia y/of biba afor. E hende muher ta bin bek uiteindelijk. Y por wak un influx di trahadornan stranhero cu ta existi di mas hende muher cu hende homber.

Riba e total di asegurado di AZV (cu ta 108.000 na november 2019) tin mas o menos 5.000 hende muher mas cu hende homber. Riba e pagina di facebook di AZV e sexonan ta dividi den 2 tercera parti hende muher y 1 tercera parti hende homber. Bou di bishitantenan di nos website tin mesun estadisticanan. Dus pa target hende homber, facebook no ta e canal mas optimal. Kico si, anto?

Dia 8 di juni di e aña aki nos a organisa e prome Aruba Health Fair. Tawatin 80 stands cu informacion, entertainment, food & drinks (saludabel). Kico bo ta pensa? 2 tercera parti hende muher y 1 tercera parti hende homber.

By the way, na AZV mes 66% di e trahadornan ta hende muher. E pregunta ta keda… Unda nos ta haya ‘e hende homber’?

Cerca e dokter di cas?

Si ta wak e gastonan di dokternan di cas ta ripara cu e grafiek ta parce esun di tur aseguradonan. E diferencia ta cu gastonan haci door di hende muher di 30 te cu 60 ana a crece mas. E grafiek cu e gastonan di remedi pa mustra un bista casi igual cu esun di dokter di cas.

Riba e plaachi ‘ki ta mira e ‘ugly truth’. Despues di 50 ana tin un piek grandi den gastonan den exterior. Si cuido medico no ta por tuma luga na Aruba, AZV ta manda bo exterior. E hende homber echt no ta bay Colombia djis pa e nursenan cute. E cantidad di hende homber cu ta wordo manda afor ta mas grandi y e periodo di e tratamento ta mas largo, esey ta zorg pa e aumento drastico den gasto.

Tur tin di haber cu e complicacionnan di e tratamento. Por imagina cu un operacion ta mas complica si e pashent tin presion halto of diabetes of tur dos. Vooral si e no ta controla. Basta tempo/placa ta wordo gasta pa pone e presion di sanger y sucu na un nivel pa por cuminsa e operacion.

Hende homber vs hende muher (den gastonan segun edad)

Den e prome binti aña e mucha hombernan tin mas gasto cu hende muher. Probablemente door cu mucha hombernan ta hunga mas bruto? Despues e gastonan di hende homber ta stabilisa. Hende muher ta den edad cu ta haya yiu y esey tin consecuencia pa e gasto medico. For di edad di 40 aña tur dos sexo ta cuminsa subi y poco poco e hende homber ta catch up. Te ora ta yega 55 aña y e hende homber ta bira campeon gasto medico. Esaki ta keda asina te cu 80, pero no pasobra hende homber di 80 ana ta bira mas saludabel cu hende muher. E hecho ta cu tin simplemente menos hende homber cu ta yega na e edadnan halto ney. E diferencia den expectativa di bida entre e sexonan ta 6 aña na Aruba. Mundialmente e periodo cu hende muher ta biba mas largo ta 5 aña. Bon noticia si ta cu e expectativa di bida di tur dos sexo ta creciendo. E crecemento for di 2000 te 2010 ta bin, segun expertnan riba e tereno ey, door di introduccion di AZV. Otro ana lo haci un midimento nobo y tin indicacion cu e cifranan di otro aña lo mustra cu e efecto positive di AZV ta sigui asina. Ta resta nos (hende homber) pa haci nos best pa haci e diferencia di 6 aña mas cortico y tuma responsabilidad pa nos salud

Un felis dia di hende homber!

Scroll To Top

Algemene Ziektekosten Verzekering