Alimentacion di mucha den temporada di vakantie

September 30, 2019

door di Kidneys297

Cuida su alimentacion

1. Durante di vakantie un mucha por subi di peso ( ½-1 kg ) si e no come un alimentacion balansa y no haci suficiente actividad fisico. Stimula p’e ta activo tur dia por lo menos 1 ora: p.e. core bicicleta, hunga bala, bula cabuya, cana den mondi, haci un speurtocht of bay lama cu ne.

2. Evita pa e mucha come dilante un ‘screen’. Esaki por haci cu e no ta come consciente y mayoria biaha di mas.

3. Si toch bo kier treat algo dushi of di smaak pa come, percura pa ofrece alimento saludabel durante e resto di dia p.e. batido di fruta y salada di berdura.

4. Ofrece mas variedad di fruta y berdura. Probecha pa haci e cuminda mas atractivo y colorido. Por haci bon uzo di fruta local y di temporada: mango, sorsaca, casho.

5. Purba di mantene orario fiho pa come: por lo menos 5 biaha pa dia di cual 3 ta e cumindanan principal y 2 pa snack saludabel entre e cumindanan (p.e. frio di mango of un man yen di druif, mini tomati, concomber corta na bloki).

6. Ora di bay come afo sea atento: e luga mester ta safe pa mucha y e cuminda prepara higienico.

7. Percura pa semper tin cuminda saludabel na cas. No tur fastfood of cuminda cumpra ta (necesariamente) malo, pero evita cu e ta bira un custumber cu ta pasa regularmente.

8. Controla porcion: Scoge semper pa e paki mas chikito di bebe (juice 100%) of di come (sakito di chips).

9. Ofrece hopi awa pa bebe na luga di juice of refresco.

10. Duna mucha tempo pa e come su cuminda, e ta bira mas consciente di kico y cuanto e ta come. Come hunto na mesa na oranan fiho.

Scroll To Top

Algemene Ziektekosten Verzekering