Cobertura

Haya sa kiko AZV ta cubri pabo

Loke ta wordo cubri door di AZV ta stipula den Ordenansa Seguro Medico General. AZV ta un seguro basico cu ta cubri gastonan medico curativo. Esakinan ta tratamento y productonan cu ta cura, monitoria of maneha e malesa cu bo tin. Un tratamento preventivo no ta wordo cubri.

AZV ta paga e dunado di cuido directo, kiermen abo como asegurado no tin mester di paga nada por ehempel pa un consulta na dokter di cas of un opname na hospital.

En general por bisa cu bou di AZV ta cay:

  • Cuido di dokter di cas;

  • Cuido di specialista;

  • Cuido di partera;

  • Cuido di Fisioterapia;

  • Cuido di Dentista; 

  • Cuido den Hospital;

  • Remedi;

  • Medionan auxiliar;

  • Cuido medico den exterior a base di aprobacion di AZV.


Cobertura

Loke no ta cay bou AZV:

  • Un chekeo general preventivo.

  • Un keuring pa rijbewijs.

  • Un keuring en conexion cu solicitud di trabou.

  • Un keuring en conexion cu peticion pa permiso na Dimas.

  • Transplante di organo (cu excepcion di cornea y beenmerg)

  • Tratamento of operacionnan den fase experimental.

  • Test DNA pa confirma paternidad.

  • Declaracion di morto.

Inscripcion na AZV:

Ora cu bo inscribi na AZV, bo lo mester scoge un dokter di cas, un botica y un dentista. Cerca nan bo ta acudi ora bo bira malo. Cada inscripcion ta individual y esey ta nifica cu cada miembro di famia mester scoge un dokter di cas, un botica y un dentista. Ta recomendabel pa registra henter e famia na e mesun dokter di cas. Esaki en conexion cu por ehempel malesanan hereditario.

Scoge un dokter di cas:

Pa dokter di cas ta conta cu por scoge dentro di e cantidad di dokter di cas cu e momento ey tin disponibel. E dokter di cas ta un profesional cu a studia medicina general y despues a specialisa su mes como dokter di cas. E tin conocemento amplio y por yuda e pashent cu diferente tipo di malesa. E ta e prome persona cerca kende abo como asegurado di AZV ta acudi ora bo bira malo.

Servicio di dokter di cas:

E gran mayoria di e dokternan di cas ta wordo representa door di e Asociacion di Dokter di Cas di Aruba (Huisartsen Vereniging Van Aruba). E dokter di cas mester ta 32 ora pa siman disponibel pa atende asegurado di AZV (consulta cu pashent). E resto di oranan den siman ta pa e dokter haci administracion (p.e. firma receta, lesa resultado di test of haci bishita na cas di pashent).

Regla di oficina di dokter di cas

Otro aspecto importante cu abo como pashent mester sa ta e reglanan di e oficina di bo dokter di cas. Bo dokter di cas of e assistente mester por duna informacion manera orario di oficina, orario pa yama pa afspraak (receta of pa haya resultado di test), unda pa localisa dokter ora tin un emergencia pafo di orario normal di oficina di dokter y unda pa acudi ora dokter a bay cu vakantie of dokter mes a bira malo.

Sistema di Triage:

Mayoria dokter di cas ta traha cu e sistema di ‘triage’. Triage ta e evaluacion di pashentnan den diferente categoria, na unda nan ta wordo clasifica segun e gravedad di e sintomanan, lesionnan y malesa. ‘Traige’ ta dus un sistema pa por determina e urgencia di e pashentnan cu ta yama pa haya un cita cerca nan dokter di cas of cu ta yega na Spoed Eisende Hulp (SEH) pa wordo atendi.

E assistente di e dokter di cas ta esun cu ta haci traige. E ta traha bou di e responsabilidad di e dokter di cas. Semper e assistente lo consulta cu e dokter di cas den caso di cualkier preocupacion. Aplicando ‘traige’ ta haya sa cua pashent ta haya un afspraak e mesun dia y cua pashent ta haya afspraak por ehempel pa su siguiente dia.

E assistente di dokter di cas:

E assistente di dokter di cas ta un persona cu a studia den e sistema di haci triage. Su persona ta evalua e historia medico di e pashent y ta haci pregunta na e pashent tocante su kehonan (sintomanan) pa percura cu e cuido wordo duna na e bon momento. Banda di esey, triage tambe ta wordo uza cada bes mas pa indica door di ken e pashent (eventualmente) mester wordo yuda y kico e continuacion di tratamento ta.

Praktijkondersteuner:

Aruba tabata tin un situacion unda cada biaha mas pashent tabata haya malesanan cronico manera diabetes, curason y presion halto. E introduccion di praktijkondersteuners na 2012 hunto cu Stichting Wit Gele Kruis tabata un stap logico pa tuma ya cu tabata desea pa brinda e grupo di pashentnan aki un guia mas personal y di calidad halto.

E praktijkondersteuner ta un persona studia riba nivel di HBO y cu tin amplio experiencia den ramo di cuido di pashent. E tarea di e praktijkondersteuner ta pa asisti e dokter di cas den e cuido di pashentnan diabetico y pashentnan cu malesanan cardiovascular. E praktijkondersteuner ta e persona cu ta duna e pashent informacion, guia y motivacion pa e pashent por keda cumpli cu su controlnan regular. Tambe su persona t’ey pa corda e pashent riba e importancia di tuma su remedinan segun prescripcion di e dokter di cas. E praktijkondersteuner ta traha independiente pero semper bou responsabilidad di e dokter di cas.

Cuido medico specialisa:

E prome dunado di cuido cu bo ta consulta cu ne ora bo bira malo ta bo dokter di cas. E ta e persona cerca kende bo ta consulta tur bo sintomanan (kehonan). E ta bon pa bo sa cu bo dokter di cas mes tin hopi conocimento y por yuda bo cu hopi cos. E por laga haci algun test of e por receta remedi si ta necesario. Tambe e por evalua si cuido di un specialista ta necesario. Ora esey ta e caso, su persona lo traha un carta di referencia pa bo.

Carta di referencia pa specialista:

E carta di referencia ta wordo yena riba nomber di e specialismo na cual bo dokter di cas ta referi bo, sin embargo como asegurado bo ta liber pa scoge cua specialista bo kier bay dentro di e specialismo. Un ehempel: bo ta wordo referi pa cardiologia (specialista di curason). Esey ta nifica cu abo ta scoge cerca cua di e cardiologonan (cu tin contracto cu AZV) bo kier bay. Bo ta yama na e oficina di e specialista pa bo haya bo afspraak. Corda di hiba bo carta di referencia y bo ZorgPas pa e specialista riba e dia di bo afspraak.

Consulta cerca specialista:

Una bes cu bo a consulta cerca e specialista, su persona lo duna bo un splicacion di kico ta su (prome) pensamento tocante bo condicion y su plan di tratamento. Dependiendo di e situacion, e specialista lo traha e plan di tratamento cual por consisti di:

  • duna conseho di cambio di estilo di bida;

  • laga haci algun test of test adicional;

  • prescribi remedi;

  • propone operacion;

  • propone terapia;

  • propone un combinacion di loke ya caba a wordo menciona of;

  • propone otro specialismo pa haya sa kico bo tin den caso cu e no por yuda bo. Esaki lo sosode a base di un reporte medico (carta) pa e dokter di cas cu e peticion pa bo dokter di cas manda bo e specialismo cu e ta propone.

Comunicacion cla

Tanto e dokter di cas como e specialista mester percura pa semper comunica den palabranan cla y facil pa abo comprond’e. E dokter ta splica bo kico su plan di tratamento ta incluyendo tur riesgo cu tin. Un tratamento no por start sin cu abo duna bo aprobacion.

Generalmente ora un tratamento keda cla, bo por bay bek bo dokter di cas. Por ehempel: un pashent cu tin un malesa cronico, no necesariamente mester keda semper na man di un specialista. E por bay bek su dokter di cas. E dokter di cas lo monitoria su salud/condicion. Ora ta necesario lo manda e pashent bek pa e specialista.

Remedi – Lista Positivo

AZV tin un lista ‘positivo’ di remedi. E lista aki ta bisa e dunadonan di cuido cua remedinan AZV ta cubri. E ta un lista amplio. Den prome instante ta wak si e remedi ta un bon remedi (farmaterapeutico) y na di dos luga ta wak e prijs di e remedi (eficiente, bon prijs).

Categoria di remedi

E Lista Positivo tin hopi remedi pa trata diferente malesa, entre otro:

  • Remedi pa trata e stoma, tripa y of higra.

  • Remedi pa trata malesanan di sanger.

  • Remedi pa trata malesanan di curason y ader.

  • Remedi pa trata malesanan di cuero.

  • Remedi pa trata e sistema urogenital y riñon (nan).

  • Remedi pa trata malesanan ocasiona door di microrganismo (parasito, bacteria, virus, schimmel).

  • Remedi pa trata tumornan benigno y maligno.

  • Remedi pa trata malesanan di weso y musculo.

  • Remedi pa trata e sistema nervioso y sentidonan.

  • Remedi pa trata e sistema respiratorio.

  • Remedi pa trata varios otro tipo di malesa / organo.

Advies Commissie Geneesmiddelenlijst AZV (AGA)

E Lista Positivo ta un lista dinamico. Esey ta nifica cu constantemente ta monitoria e desaroyonan den mundo farmaceutico. Remedinan nobo ta bin riba mercado, otronan no ta wordo fabrica mas. Kiermen e lista ta wordo adapta segun e desaroyonan. E Lista Positivo a wordo compila door di Advies Commissie Geneesmiddelenlijst AZV, esta AGA.

AGA tin e tarea pa duna conseho tocante tratamento medico cu enfasis riba remedi. AGA ta sigui den principio e criteria di College voor Zorgverkeringen (CvZ) di Hulanda, tanten cu esaki ta aplicabel pa e situacion di Aruba. CvZ ta mantene e publicacion di e Farmacotherapeutisch Kompas cu a wordo traha bou di responsabilidad di e Comision di Cuido Farmaceutico (CFH) di Hulanda.

Busca remedi

Ora bo dokter di cas of specialista receta remedi, bo ta acudi cerca bo botica pa entrega e receta y bo botica lo duna bo e remedi. Den caso cu e botica no tin e remedi pa bo, e botica (boticario) mester comunica cu bo dokter pa evalua cua otro remedi bo por haya.