Pakete › AZV plus

 AZV Plus ta seguro di dunado di trabou

 

Organo Ehecutivo AZV ta ehecuta e Ley di AZV cu ta conta pa tur hende cu ta biba legalmente na Aruba. Banda di esey Organo Ehecutivo AZV ta administra pa empleadonan publico e gastonan medico cu no ta cay bou di AZV, pero bou di nan seguro medico adicional, esta AZV Plus.

 

AZV Plus ta un seguro di dunado di trabou, cual ta den e caso aki Gobierno di Aruba. E empleadonan publico y empleadonan publico cu pensioen tin derecho riba AZV banda di e pakete di AZV (basico).

 

Ken tin derecho riba AZV Plus?

E empleado publico y esunnan cu tabata ambtenaar y ta pensionado awor tin derecho riba AZV Plus. Banda di esakinan un persona cu tin mesun derecho cu empleado publico (arbeidscontractanten y gelijkgestelden) tin AZV Plus.

No ta e persona mes so cu tin derecho riba AZV Plus, pero tambe su casa y yiunan (pa ken kindertoelage ta wordo ricibi).

 

Restitucion di gasto medico

Ta asina cu 90% di e gastonan di e derechonan cu ta bay bou di AZV Plus ta wordo cubri. E 10% cu ta resta ta pa cuenta di e asegurado mes.

 

Procedura

Pa bo mustra cu bo tin derecho riba AZV Plus, bo mester di un declaracion di departamento (verklaring van dienst). E declaracion aki no mag di ta mas bieu cu 1 luna. E declaracion aki bo ta hiba cerca e dunado di servicio cu lo tuma contact cu AZV pa haya permiso pa cuminsa e tratamento. Pa esnan cu a bay cu pensioen caba e procedura ta mas facil, pasobra nan tin menciona riba nan Zorgpas cu nan tin derecho riba AZV Plus. E casa y yiu no tin nada skirbi riba e ZorgPas y pa nan ta conta e procedura prome menciona.

 

Ora bo kier haya restitucion di gasto medico cu bo a haci den exterior, bo tin cu bini personalmente na oficina di AZV cu e facturanan original, hunto cu e prueba di pago. Tambe tin mester di e reportahe medico di e clinica. Un peticion di restitucion mester wordo entrega prome cu 1 aña y 3 luna despues di e tratamento a tuma luga. Peticionnan cu ta yega mas laat lo no wordo trata mas.

 

Cobertura di AZV Plus:

 

Logopedia

Ora un medico ta haya tratamento di un logopedista deseabel e asegurado tin derecho riba 12 sesion adicional riba loke ta wordo cubri door di AZV basico. Den casonan particular Organo Ehecutivo AZV por, a base di peticion di un medico, extende e cantidad di sesion. Esaki ta bay cu 12 sesion maximo cada biaha, cual tin cu wordo aproba door di AZV adelanta.

 

Fisioterapia

Den caso cu bo a haya caba e cantidad maximo di sesion di fisioterapia bou di AZV pa 1 cierto indicacion den 1 aña, bo por haya 12 extra sesion cu ta cay bou di AZV Plus.

 

Chiropractica

Den caso cu bo dokter di cas of specialista ta haya necesario, 12 sesion di chiropractica ta wordo cubri cu aprobacion di Organo Ehecutivo AZV. Organo Ehecutivo AZV por extende e cantidad di sesion. Esaki ta bay cu 12 sesion maximo cada biaha.

 

Bril

Tin un compensacion maximo di afl. 350,- pa montura y glasnan di bril pa maximo 1 biaha pa cada 2 aña. Pa asina yama glasnan "high index" y contactlenzen tin mesun compensacion si nan a wordo prescribi y bo tin un dioptria di 6 of mas halto.

Si den e periodo di 2 aña bo refraccion ta cambia, e ta posibel pa haya e recompensacion den e periodo ey. Naturalmente mester di un prescripcion di bo dokter di wowo of opticien cu e refraccion a cambia.

 

Psicologia

Den caso cu bo dokter di cas of specialista ta haya necesario, 12 sesion di cuido psicologico ta wordo cubri. AZV por, a base di peticion di un dokter, extende e cantidad di sesion. Esaki ta bay cu 12 sesion maximo cada biaha.

 

Dentista

Pa limpieza di djente ta existi un compensacion di afl.58,50 pa maximo 2 biaha pa aña. Pa un protesis di frame y tratamento ortodontico pa clase II-1 (deep bite), clase II-2 (open bite) y clase III, unda ta sosode problema di come of papia tin e siguiente compensacion ora AZV a duna un aprobacion a base di peticion di un dentista:

 

Pa e protesis di frame (vitalium)

1 elemento afl. 153,-

2 elemento afl. 180,-

3 elemento afl. 207,-

4 elemento afl. 234,-

5 elemento afl. 261,-

6 elemento afl. 288,-

7 elemento afl. 315,-

8 elemento afl. 342,-

9 elemento afl. 369,-

 

Pa tratamento ortodontico afl. 4050,-

 

AZV Plus durante dienstreis

Si bo ta bira malo durante un dienstreis of bo ta haya un accidente di trabou. Tur e gastonan medico ta wordo cubri door di AZV Plus. E ora ey bo tin derecho riba 100% di restitucion.

 

AZV Plus ora di bay cu vacacion den exterior

Si bo ta bay exterior pa vacacion no lubida di cumpra un seguro di biahe. AZV Plus ta cubri solamente e gastonan cu no ta wordo cubri door di bo seguro di biahe. Y banda di esey mester ta trata di un tipo di cuido medico urgente cu no por wordo pospone te regreso na Aruba. Dus, semper cumpra un seguro di biahe ora di bay cu vacacion.

 

Empleado publico pensionado

Pa empleado publico pensionado ta conta cu nan tin cu avisa AZV ora nan ta bay exterior. Esaki por via un carta, pero tambe via email na info@uoazv.aw of nos website www.azv.aw. Un empleado publico pensionado por keda den exterior te cu 1 aña largo. Gastonan medico cu ta wordo haci den e periode aki ta wordo cubri pa 90%.

 

Dokter na warda
Pabow di brug Telefon: 527 4580HuisartsenpostOranjestad583-4200 Pariba di brug Telefon: 524 8833 Centro MedicoSan Nicolas584-4000
Botica na warda
Pabow di brug Pariba di brug
Back to top