Pakete › Tratamento medico den exterior

Bo a bira malo. Bo specialista ta bisa bo cu bo lo mester haya cuido medico den exterior. Bo specialista ta haci un peticion na AZV. Solamente si tin (previo) aprobacion di AZV, e gastonan di cuido medico den exterior ta wordo cubri door di AZV. E prome cos cu bo mester tin na ordo ta bo paspoort. Den caso cu ta aplicabel, tambe un visa valido. Kico ta bay pasa?

 

CGZ

Bo specialista ta manda un peticion pa AZV. Un peticion ta wordo evalua door di un comision independiente yama Commissie Grensoverschrijdende Zorg esta CGZ. CGZ ta evalua a base di dos punto:

Despues di evalua e peticion, CGZ ta duna un conseho na AZV. Den mayoria caso, AZV ta tuma e conseho over di CGZ. E paisnan unda cu un asegurado por bay ta Corsou, Colombia, Hulanda y Merca.

 

Aprobacion di AZV

 

Ora cu tin un aprobacion di AZV, esaki ta nifica cu AZV ta bay regla e afspraak, biahe y estadia pa e asegurado. Tambe pa e acompañante social. E asegurado ta bay e pais cu AZV ta indica. E tempo pa warda pa haya un afspraak ta depende di e cantidad di cupo cu tin disponibel cerca e hospital.

 

AZV ta cubri:

 

 

 

Departamento di Cuido Medico den Exterior

 

Ora AZV ta bay di acuerdo pa cubri e tratamento, AZV lo pidi un afspraak pa e asegurado cerca e hospital den exterior. Despues un empleado di Departamento di Cuido Medico den Exterior ta tuma contacto cu e asegurado. Ta pidi informacion importante, entre otro number di paspoort di e asegurado y di su acompañante social. E acompañante social ta un persona cu e asegurado mes ta scoge. AZV ta cubri pa un solo acompañante social. E persona aki ta preferiblemente:

* Un persona cu tin un polisa valido na AZV (dus e mes ta un asegurado di AZV) y den caso cu ta aplicabel e persona tin un permiso y visa valido.

* Un persona cu por acompaña e asegurado ful e tempo cu e ta bay keda den exterior.

* Un persona cu ta den bon condicion di salud, ta mayor di edad y ta domina diferente idioma.

Despues cu AZV ricibi e confirmacion di e afspraak di e hospital den exterior, e empleado di Departamento di Cuido Medico den Exterior, ta bolbe contact e asegurado. Ta traha un afspraak pa busca tur documento na AZV (ticket di biahe y carta di garantia).

 

Ta bon pa e acompañante social cera un seguro di biahe. Gastonan di malesa (inespera) di e acompañante social no ta cay bou di AZV.

 

Yegada den exterior

 

Corsow:

 

Na Corsow e asegurado y su acompañante social por tuma un taxi y bay e hospital y of e luga pa keda. Por ehempel e asegurado ta keda na Pietersz Guesthouse ora cu e ta haya tratamento na Sint Elisabeth Hospital. Ta keda den contacto cu AZV y ora cu ta cla, AZV ta regla e biahe di regreso.

 

Colombia:

 

AZV tin contracto cu varios hospital na Colombia. Ora bo wordo manda pa Colombia, lo bo haya e tratamento cerca un di e hospitalnan aki:

Fundacion Valle del Lili na Cali (FVDL)

Hospital Pablo Tobon Uribe na Medellin (HPTU)

Fundacion Cardiovascular de Colombia (FCV) / Hospital Internacional de Colombia (HIC)  na Bucaramanga

Clinica General del Norte (CGN) na Baranquilla

Hospital Universitario San Ignacio (HUSI)

JEMARZ (antes CIMAD)

 

Tur e hospitalnan aki (cu excepcion di CIMAD) tin un Departamento di Servicio pa Cliente Internacional cu ta yuda e asegurado ora tin pregunta. JEMARZ tin un persona di contacto pa atende aseguradonan di AZV.

 

Hulanda:

 

AZV tin contracto cu Erasmus Medisch Centrum Rotterdam na Rotterdam. Ora bo ta bay Erasmus Medisch Centrum Rotterdam bo ta ricibi un foyeto yama "Wegwijs bij opname, informatie voor patiënten uit Aruba". E foyeto aki ta duna bo informacion tocante bo ingreso, tratamento y estadia na Erasmus Medisch Centrum Rotterdam.

 

E personanan di contacto di Erasmus Medisch Centrum Rotterdam ta:

 

Mary Schoester international.patient@erasmusmc.nl telefon (010) 7034575

Gino Hartman  international.patient@erasmusmc.nl   telefon (010) 7031341

Sabrina van Dam international.patient@erasmusmc. nl telefon (010) 7033252

 

Otro hospital na Hulanda:

 

AZV ta traha cu otro hospital na Hulanda tambe. Y pa asegurado cu ta biaha pa un otro hospital, AZV tin un representante cu ta Transcaring. Pa tur pregunta of inkietud, e asegurado of su acompañante social ta tuma contacto cu Transcaring.

  

Merca:

 

Den principio, AZV semper ta purba manda e asegurado den nos region. Sin embargo, sa sosode cu ta necesario pa un asegurado wordo manda Merca. Den tal caso, AZV ta percura pa regla e biahe y e afspraak. AZV lo tene contacto directo cu e hospital na Merca. Tambe e asegurado of su acompañante social mester keda semper den contacto cu AZV.

 

Acompañante social

 

Ora tin un aprobacion pa un acompañante social, AZV ta duna e acompañante social un carta di declaracion cu ta conforme e persona cu lo acompaña e pashent. E carta aki por wordo uza pa por ehempel e dunado di trabou.

 

Cambio di acompañante social

 

Algun asegurado mester keda pa un tempo largo den exterior. Por ehempel 6 siman of 9 siman. No ta tur acompañante social por keda ful e tempo ey. Cambio di acompañante ta posibel, sin embargo AZV no ta paga e ticket di biahe pa e segundo (of mas) acompañante. Den caso cu bo tin e intencion pa cambia di acompañante, avisa esaki tempran na e Departamento di Cuido Medico den Exterior. E ora nan ta tene cuenta cu esaki ora cu ta traha e cartanan di garantia.

 

Acompañante medico

 

Ora tin mester di un acompañante medico, e specialista lo indica esaki riba e peticion. Por lo general, e specialista mes lo regla esaki tambe. Si AZV aproba un acompañante medico, e ora e gastonan di e acompañante medico ta bin cuenta di AZV.

 

Gastonan medico

 

E gastonan di e hospital ta wordo cobra directamente na AZV.

 

Compensacion financiero pa dia den forma di 'vouchers' y of 'debitcards'


E compensacion financiero pa dia ta un suma fiho entre $10 pa $20 cual ta wordo duna pa medio di un 'debitcard' of 'voucher'. Un excepcion ta Hulanda. Pa Hulanda e compensacion ta euro 23,21 pa dia pa persona (23 euro si ta bay Erasmus Medisch Centrum Rotterdam).

E calculacion di e compensacion financiero pa dia ta basa riba dos cos:

 

E asegurado ta wordo informa tocante e compensacion financiero pa dia y cual ta wordo duna den forma di 'debitcard' of 'voucher' ya cu AZV ta introduciendo esaki gradualmente den tur hospital cu AZV ta traha cu ne den exterior.

 

Cuenta di banco



AZV ta pidi e asegurado (pashent) pa su cuenta na banco. Esaki ta pa facilita e proceso di e compensacion financiero den caso cu ta necesario (por ehempel paso e clinica ainda no tin sistema di 'debitcard' of 'voucher'). Den caso cu un asegurado no tin un cuenta di banco, e ora AZV ta permiti pa duna number di un cuenta di banco di un apoderado.

 

Importante! Prome cu bay biaha ta bon pa avisa bo banco cu bo ta bay di biahe, pa bo banco por habri bo 'atm-card' (dus cu por 'swipe' den exterior).

 

Ora mester keda mas tempo

 

Sa sosode cu e asegurado mester keda mas tempo den exterior. Den tal caso, e specialista (den exterior) ta percura pa manda e consehero medico di AZV un informe medico. Den paisnan unda AZV ta traha cu un broker, e informe medico mester wordo manda via email of fax pa e broker.

 

Tin ora e specialista den exterior ta recomenda un tratamento cu na Aruba ta posibel. Por ehempel, si e specialista recomenda fisioterapia y esaki por wordo duna na Aruba, e ora AZV ta nenga e peticion. Ta laga e asegurado bolbe Aruba pa sigui su tratamento akinan mes.

 

Ora AZV duna aprobacion pa keda mas tempo, e cartanan di garantia lo wordo prolonga door di nos broker. Den caso cu no tin un broker, e ora e Departamento di Cuido Medico Den Exterior ta percura pa e cartanan di garantia y e compensacion financiero pa dia.

 

Regreso pa Aruba

 

E Departamento di Cuido Medico Den Exterior regularmente ta haya informacion di e hospital of e broker. Na momento cu e asegurado wordo informa cu e tratamento ta cla, e ora e mester tuma contacto cu e broker of e Departamento di Servicio pa Cliente Internacoinal. Nan lo regla e biahe di regreso.

 

E biahe di regreso semper ta wordo regla despues cu e broker (of e Departamento di Servicio pa Cliente Internacional) ricibi e informe medico. E informe medico ta inclui e confirmacion cu e asegurado por bay cas bek.

 

Den caso cu no tin un broker, e ora e asegurado of acompañante social ta contact e empleado di Departamento di Cuido Medico Den Exterior. Akinan tambe ta conta cu e biahe di regreso ta wordo regla despues cu ricibi e informe medico. E specialista na Aruba tambe ta wordo poni na altura cu su pashent a keda cla. E biahe di regreso mayoria biaha ta bay via un avion comercial. 

 

Solamente den casonan excepcional unda cu e specialista den exterior ta indica cu e asegurado (pashent) mester regresa Aruba cu un air ambulance, e ora AZV lo evalua esaki. Den caso cu duna aprobacion pa regreso cu air ambulance, e ta nifica cu e pashent mester warda ora cu e siguiente caso urgente presenta (caso di otro pashent) y cu lo mester pidi un air ambulance. Esaki por dura algun dia te cu tres siman. E motibo pakico AZV ta haci esaki tin di haber cu e gastonan di un air ambulance. Cada biahe di air ambulance ta costa entre 15 mil pa 22 mil (US) dollar.

 

Despues cu bo yega Aruba, ta recomendabel pa bo tuma contacto cu bo specialista of dokter di cas y inform'e di bo tratamento cu bo a caba di haya den exterior. 

 

Pashent a fayece den exterior


Sa sosode cu e asegurado (pashent) ta fayece durante di su tratamento den exterior. Esaki ta un situacion tristo y dificil. E acompañante social mester bay duna su cooperacion pa e reglamento di e documentonan oficial di e fayecido pa por prepar'e y tranport'e. Esaki ta tuma tempo (mas o menos 10 dia) y den mayoria caso e proceso ta diferente di loke ta custumbra na Aruba. Por ehempel na Colombia e ley ta stipula cu un fayecido mester wordo dera dentro di 2 dia. Pa e motibo ey, e funerarianan na Colombia no tin freezer. Algo fastioso pa e famia di e fayecido ya cu e fayecido lo por yega Aruba den un condicion cu nos na Aruba no ta custuma cu ne.

E gastonan pa preparacion y transporte di e fayecido te na yegada di aeropuerto Reina Beatrix ta wordo cubri door di AZV. Otro gastonan (di entiero) ta pa cuenta di e famia di e fayecido.

 

Dokter na warda
Pabow di brug Telefon: 527 4580HuisartsenpostOranjestad583-4200 Pariba di brug Telefon: 524 8833 Centro MedicoSan Nicolas584-4000
Botica na warda
Pabow di brug Pariba di brug
Back to top